Op die strand; meneer is "besig" om bietjie aarde te veskuif met sy grafie en emmertjie; speel met die karretjies in die sand - begrawe hulle. Daar is seker nog 'n paar wat daar onder die sand lê; sal sorg vir groot opgewondenheid en dan groot teleurstelling vir die assvoëls met hul metaalverklikkers...
Hy was mal oor DJ. Hulle het ure lank saam geswem. DJ lyk vir my reg vir babas; drie van hulle!!
Hy (Jan-Hendrik) het darem so bietjie tyd aan my ook afgestaan. Elke keer as ek net lekker droog is moet ek terug gaan see toe om te swem. Hy het die speel op die strand baie geniet. Hy besef natuurlik nog nie dat daar pragtige gholfbane op die kus is nie...
En op die strand kan mens ure lank na die ander mense en die jong mammies sit en kyk. Ek het op 'n stadium vaagweg 'n gesprek gevolg tussen twee jong mammies in die vlak water; kon niks sien nie want ek het nie my bril opgehad nie (was so effe spyt na gelang van die inhoud van die gesprek). Die een het die ander (in 'n slapperige Sandton aksent) oortuig dat die "surgery" oor en oor die moeite werd was, en hulle het afgesluit met iets soos "and honey, remember to go big". Ek is nie heeltemal seker waaroor hulle gepraat het nie.
Ons het uitgekamp soos regte Transvalers!! Kom son-verwante siektes soek op die strand...
Sussa was ook daar; meeste van die tyd geslaap of geskreeu. Ons het haar mooi toe en beskerm gehou, maar selfs sy het so bietjie van 'n tan gekry..
Op hierdie stadium het ek en Marinda elkeen 'n kind (en ons leef so klein bietjie by mekaar verby; dit sal seker normaliseer eendag) - Marinda het die pienk skreeuerige een...
... en ek het die stoute 2-jarige wat deesdae net een vraag ken: "Wat is dit?"Ek en Sussa het later besluit om eerder te gaan krieket kyk in die koelte en beskerming van die flat. Marinda en DJ het in die see gebaljaar soos toe hulle op skool was.
