Welkom in die familie, Tiaan!!!

Conraad en Verushka se seuntjie is gebore op die Vrydag voor ons met vakansie was (26'e Maart). Dis die mooiste mannetjie - nogal klein, met 'n cute gesiggie; lyk soos sy Pa! Jan-Hendrik het geweet 'n mens moet saggies vat aan iets wat so klein is. Hier ontmoet hy sy eerste nefie - Tiaan (Gert Pieter Christiaan) Bezuidenhout. En so raak die familie net weer groter. Wonderlike gedagte. ------------------------------

Die baba slaap omtrent die hele tyd (soos meest ebabas maar doen), daarom het Jan-Hendrik maar alleen gaan spring; tot vermaak van almal; sonder om seer te kry.

------------------------------

Ek weet wat Marinda dink. Was Jan-hendrik ooit so klein en pap? Dis 'n tyd wat ek self baie sleg onthou. Vir my was hy nog altyd groot, aan die spring en gesels. (Ek kan nie wag vir ons volgende een nie!)

------------------------------

Howzit Tiaan!!

------------------------------

Howzit Jan-Hendrik! Sy beste pel met die kuier in Virginia was Vettie die hond. Hulle is omtrent ewe groot.

------------------------------

Daar smelt sy Pa se hart al weer. En hoe anders? Hy's 'n engel!

------------------------------

Hy is ook mal oor al die mans in die geselskap - Conraad en al die Oupas.

------------------------------

Oppad terug Nelspruit toe het ons net gou weer by Potch gestop en lekker gekuier met Oupa, Ouma, Andrew en Tanya. Ons het wragtag die hele familie gesien in 'n kwessie van 8 dae! Kyk hoe lyk hulle dieselfde!

------------------------------

En die bakkie se bonnet maak 'n heerlike spring oppervlakte. Dit duik selfs in!

Two Oceans 2010!

Die dag voor die Oceans het ons die nodige formaliteite gaan afhandel by die Expo by die Good Hope sentrum in Kaapstad. Vreeslik baie uitstallers, maar geen Oceans-spesifieke klere en ander goedere nie - eintlik teleurstellend. Ek het ook my goodie bag gaan optel vir die 21km waarvoor ek ingeskryf het. Niks geoefen nie, dus nie gehardloop nie.

------------------------------

Die oggend van die race - vrek vroeg opgestaan. Hier is ons by die wegspring en daar is duisende mense. Dit is 'n wonderlike gees wat heers so by die begin van die wedloop - nogal aansteeklik!

------------------------------

Die skoot het geklap, en ek is weg - om vir my ontbyt te gaan soek ... Kyk hierdie pragtige ou groot boom in een van die ouer dele van die stad.

------------------------------

Oppad na die halfpadmerk ry ek oor Oukaapseweg. Het dit laas met my fiets gedoen omtrent 8 jaar gelede. Ek is verbaas dat dit so mooi is bo-op die berg. Met die fiets het ek baie ander emosies gehad...

------------------------------

By die halfpadmerk aangekom, en hier is die Russiese tweeling wat verby kom met hulle usual ek-wil-op-die-tv-wees-kyk-mamma-in-soweto-hier-is-ekke groepe mede-hardlopers.

------------------------------

Marinda was seker net 10 minute agter die Russe, en ek moet sê sy was baie meer ontspanne! Ek was net bly ek het haar raakgesien tussen die massas.

------------------------------

Direk daarna einde toe gery; verskriklike swaar verkeer gekry naby die universiteit; omtrent geen parkering nie!

------------------------------

En hier kom sy in (uitenidelik), met 'n spogtyd van 5:59!!!! Ons is almal baie trots op haar. My ma-hulle en Jan-Hendrik was daar om haar te verwelkom by die eindstreep.

------------------------------

Jan-Hendrik was nie baie happy nie - te veel mense (ek stem saam), en te harde musiek (stem saam), en die aankondiger het 'n irriterende stemmetjie gehad... maar nog steeds 'n wonderlike dag! 6 ure wat ongelooflik vinnig verby gevlieg het!

Wat is 'n Kaap-vakansie sonder 'n bietjie wyn?

Ons het een oggend die wynplase besoek in die Durbanville area - Durbanville Hills, Hiilcrest, en Nitida. Die Durbanville Hills fasiliteit baie smart - 'n groot proe lokaal met baie lekker wyn, maar die mense wat jou bedien weet nie veel nie. Die kelder, gebou en die wingerde in hierdie area is iets besonders!

Die Hillcrest wynplaas is baie klein, en die wyne om te proe is baie beperk. Nitida was 'n lekker besoek - ek het gehou van veral hulle Riesling en die Semillon. Ek ken nie regtig Semillon in sy suiwer vorm nie, maar ek het dit geniet, en daar was ook 'n lekker Semillon by Steenberg.

Steenberg is baie smart; amper aan die onpersoonlike kant, maar hulle wyne is baie lekker, en was veral impress met hulle Nebbiolo (nog nooit gedrink nie; lyk en proe amper soos 'n Pinot noir). Terwyl Marinda gehardloop het, het ek 'n heerlike (maar peperduur) ontbyt daar gehad.

Die Kaap op sy mooiste!

Dit was heerlik in die Kaap, en ons het net wonderlike weer gehad. Ons het 'n paar dae alleen in Blouberg gaan bly, baie naby aan die woonstel waar Jan-hulle gebly het so 'n paar jaar gelede. Dit is darem 'n unieke gesig - die tafelberg. Ons was ook baie beïndruk met hoe mooi en skoon die Kaap is. Die antie (Zille) doen iets reg, maak nie saak wat wie van haar sê nie...

En kyk net wie het ook kom kuier - ons boot die MSC Simfonia! En die stadium by Groenpunt is baie indrukwekkend - vreeslik groot (maar ek sien nie parkering nie...)

Jan-hulle se huis in Stellenbosch

Jan-hulle het 'n pragtige huis op De Zalze net buite Stellenbosch. Die huis se uitsig aan die een kant is die Chenin blanc wingerde, en aan die ander kant die tweede fairway van die gholfbaan. En laat die middag sak die son so dat die berge van Stellenbosch roesbruin verkleur met die agtergrond van blou lug en die voorgrond van groen wingerde. En in die oggende 'n wonderlike miswolk wat die hele streek soos 'n kombers toevou en saggies fluister - slaap nog 'n rukkie...

Die familie in die Kaap

Jan Willem Hendrik en Jan Willem Hendrik het baie goed ge-click. Dit was baie goed om Jan en Annette en die kleintjies weer te sien. Hulle was die laaste keer by ons in Nelspruit, en dit was baie lekker om by hulle in Stellenbosch te gaan kuier. En hulle nuwe huis is baie netjies.
Hier speel die kinders spring-spring. Oupa staan daar om te keer as hulle skeef en te hoog spring. Niemand was lus om 'n regte dokter te gaan soek nie. Kyk hoe keer Annies vir haar gesig!

Ouma en Oupa moes ook maar help om die kinders se magies vol te hou; hier was ons in die restaurant by Blouberg, en gelukkig het Ouma dit reggekry om vir Jan-Hendrik aan die slaap te maak - toe kon ons eet in vrede!

Niggies in die Kaap!

Jan-Hendrik en sy niggies het baie lekker gespeel, veral hy en Annies; die drie was elke wakker minuut van die dag besig met een of ander speletjie - spring-op-die-leerbank was die mees populere speletjie; Annies het hom mooi geleer hoe om op die gevaarlikste plekke af te spring. Ouma en Oupa het vir almal geskenke (en veral klere) saamgebring - kyk hoe mooi is hierdie twee in hulle baadjies!
------------------------------
Nelia speel viool dat die biesies bewe (letterlik) - saam met haar pa en haar ousus. Die oulikste ding wat ek in 'n lang tyd gesien het. Die intensiteit was baie duidelik, en sy copy alles wat haar sussie doen.

------------------------------

En haar sussie doen dit baie goed, en sonder enige inspanning!

------------------------------

Hier is die drie - die twee dogtertjies weet nou al dat 'n mens moet pose vir die kamera - die baba sien iets anders raak!

------------------------------

Hy het soms so bietjie met Nelia vasgesit - eintlik het hy die hele tyd met haar speelgoed gekarring - sy was nie altyd mal daaroor nie.

------------------------------

Hy het ook 'n oorlog begin met hierdie arme hottentotsgot; gelukkig het niemand seergekry in die proses nie. Hier was evolusie goed ten toon gestel - Jan-Hendrik het die drang gehad om die gogga dood te maak - eers gegooi met 'n blokkie, toe geslaan met strootjies en stokkies, en toe gegooi met 'n bal; en toe gaan haal hy 'n groter bal - dit was ongelooflik om te sien hoe sy breintjie planne maak! Die gogga het ook sy eie evolusionere tools goed gebruik! Eers homself laat groter lyk, probeer om in die trappe se hoekies weg te kruip, toe selfs (pro-aktief) aangeval, en toe selfs gemaak of hy dood was... Kom ons sê maar net dat niemand die fight gewen het nie (danksy Ouma Corrie).

------------------------------

Hier vertel Oupa vir Nelia 'n Jannie-storie. Sy luister diep en aandagtig, maar ek wonder of sy enigiets glo...

Jan-Hendrik se eerste vlug!

Ons het oppad Two Oceans toe sommer in 'n hotel by die lughawe oorgebly, net om seker te maak ons mis nie die vlug Kaap toe die volgende oggend nie. Jan-Hendrik het (al weer) al die hoekies en knoppies in die kamer herontdek. ------------------------------

Die lughawe in Johannesburg lyk deesdae baie indrukwekkend, en is vreeslik groot! Mens voel of jy êrens oorsee op 'n lughawe loop. Dit moes 'n fortuin gekos het.. ek wonder wie het daarvoor betaal. En dis net sokker oral. Ek voel sommer lus en koop my geel bafana hempie!

------------------------------

Ons vliegtuig - Kulula.com - maande terug al bespreek teen so R2300 vir almal van ons (retoer). Nou kos dieselfde kaartjies omtrent R10000!

------------------------------

En die lughawe in Kaapstad is ewe indrukwekkend!

------------------------------

Jan-Hendrik het heerlik op-en-af in die vliegtuig se gangetjie gehardloop, en almal het maar gehelp kyk na hom! Stilsit wou hy nie. Terug het hy gelukkig die grootste deel van die vlug geslaap.

------------------------------

My seun en sy Ma by die vliegtuig waarin hy sy eerste vlug gehad het. Hy lyk nie regtig beïndruk nie.. 'n Heerlike warm sonnige dag in die Kaap!